A Gaudi gheat bei uns oiwei dazua
München - Heit in da Serie "tz auf Bairisch": Da Krebs Wolfgang (48). Er is glei mit zwoa Dialekte aufgwachsn.
Es stimmt scho: Wer Bairisch redt, der ko bsondas guad fluacha und schimpfa. Aba: Er hot aa bsondas vui Gaudi. Des ko zum Beispui da Krebs Wolfgang (48) bestätign – Sie kennan eahm wahrscheinlich ois Kabarettistn und Parodistn. Er is glei mit zwoa Dialekte aufgwachsn: Obafränggisch vom Babba, Obabairisch vo da Mama. Er is übazeugt: „Sprache liefert Identität.“ Fia eahm is d Sprach aa as wesntliche Werkzeig bei da Arwad. Wer eahm zuaheat – ois Stoiber, ois Seehofer, ois Beckstein, ois Allgäua Schlagasänga Meggy Montana –, der merkt, wia vui übas Ren bassiat. Dass net bloß wichtig is, wos ma sogt, sondan aa, wia mas sogt.
Wer s
i näha dafia intressiat, der ko si an Krebs net bloß im Fernsehn oschaung oda im Radio ohean, sondan der konnan jetz aa in seim neia Buach lesn – des hoaßt Nur Bayern im Kopf. Zum Neischmegga a Absatz, in dem da Krebs ois Stoiber auftritt: „Sehr geehrte Bundeskanzlerfrau! Ich meine Frau Bundeskanzler … in … liebe Parteifreunde, verehrte Ehrengäste, herzlichen Dank an die Amberger äh die Bamberger Euphoriker äh Symphoniker äh Singfoniker“.
Sie merggan scho: Des macht an rechtn Spaß beim Lesn. Und Sie merggan an so am Beispui, wia vui ma mit da Sprach auslösn ko …
Da Krebs Wolfgang, „Nur Bayern im Kopf“, Rosenheimer Verlag, 250 Seitn, 16,95 Euro.