A Hund is er fei scho

Neis Buach üba bairische Sprich

+
Da Rottmeier Johann mit seim Biache im Wohnzimma.

Nürnberg - Heit in da Serie "tz auf Bairisch": Da Rottmeir Johann (67) und sei neis Buach üba bairische Sprich.

"A Hund bist fei scho": So hoaßt as Biache – und so gäht aa a bairische Respektsbezeugung. Wenn ma oam sogt, er is a Hund, na hoaßt des, ma hoit denjenign fia gscheit und grissn.

Beim Rottmeir Johann (67) derf ma mit Fug und Recht song: Er is da ­gräßde Sprichbeitl vom ganzn Land – und des is no net amoi ois Beledigung gmoant. Da Johann is nämlich derjenige, der des neie Biache A Hund bist fei scho gschriem hot. Des is a Sammlung vo de intressantestn bairischn Sprich: Do werd erklärt, wos de Gsatzln jeweils ­hoaßn (aa fia Preißn vaständlich). Da Rottmeir Johann sogt: „Ogfangt hots dodamit, dass i a Familienchronik von meina Mama gfundn hob, außadem oide Fuimaufnahma vo meine Äiddan.“ Dabei is eahm aufgfoin, dass si d Sprach in dene boor Jahrzehnte scho ganz schee vaändat hot. Deshoib hot si da Johann denkt, er schreibt Sachan auf, de eahm wichtig san – einfach, damits net valorn gengan. Und dodraus is nacha des Biache worn.

Da Johann, der aus da Dachaua Gegnd kimmt, sogt: „Mir is scho klar, dass ma den Wandl vo da Sprach net aufhoitn konn.“ Er is oiso koa militanta Dialekt-Missionar – aba doch a Mensch, dem sei Sprach und sei Herkunft wichtig is. Übrigns: As Material fia sei Sprichsammlung is net bloß dahoam in da Familie zammkemma, sondan aa in hächste politische Kreise. Da Johann, mittlaweile in Pension, war nämlich leitnda Beamta in vaschiedne Ministerien und in da Staatskanzlei – und zwar unta drei vaschiedne Ministapräsidentn (Stoiber, Beckstein, Seehofer). Mia kenna uns guat vorstäin, dass do in de Kantina net bloß oiwei Hochdeitsch gredt worn is.

Und koa Angst: Am Johann sei Buach is – wia soi ma des song – sicha net des, wos a Preiß „politisch korrekt“ nenna daad. Jetzt aba Schluss mit da Theorie, jetz frong ma an Johann säiba! Er zoagt uns seine liabstn Sprich ausm Biache:

Da Deife huift seine Leid, aba hoin duat as aa.

Des is a bissl a Trost, wenn ma jemand ­andas siehgt, der an Hauffa Gäid vadient. Ma moant na, do miassat da Deife seine Finga im Spui ham – und de Quittung dafia gaabats scho no späta …

D Mam wenn ma net hättn, na kannt ma uns glatt a Sau hoitn.

Net direkt charmant. Gmoant mit dem Spruch is: Wenn wos vom Essn übableibt, na issts d Mama.

Oiss, wos ma se ­daheirat, braucht ma se net daarwan.

Wenn oana des Motto beherzigt, nacha werd koa Liebesheirat aussikemma. Gmoant is, dass ma bei da Brautschau net unbedingt aufs Gfui oda aufd Optik schaung soi, sondan aa aufn Gäidbeitl.

Des is a Arwat fia oan, der wo Vatta und Muatta daschlong hot.

So lasst si da Bayer üba a schware oda dreggade Arwat aus – jednfois üba a ­Tätigkeit, wo ma einglich bloß am Sträfling zuamutn ko.

Hoiwert so deia und doppet so schee.

Des is a Rat von oda fia Leit, de scho länga vaheirat san und wos drum gäht, dass aa amoi oana alloa weggeh ko.

I back di glei beim Arsch und beim Gnack und heb di so lang beim Fensta naus, bis di d Muckan obgfieslt ham.

A spektakuläre Drohung: So ko der Bayer seim Gegnüber klarmacha, dass er jetz glei grantig werd – aa, wenns mit da praktischn Umsetzung vo da Drohung vielleicht schwierig werd …

Do hat der Zimmamo s Loch nausgmacht.

Der Satz is auf alle Fälle as End vo jeda ­Diskussion. A Preiß daad song: „Da ist die Tür!“

Grea wenn koa Farb net waar, na hätt er gar koane.

So ko der Bayer üba jemand ren, der gscheit schlecht ausschaugt – entweda weil ­derjenige richtig krank is oda weil er z vui gsuffa hot.

Des san de ürgan Hund, de wo se säiwa beissn.

Den Satz ko ma gern mit am Kopfschüttln begleitn … Sowos sogt ma nämlich üba oan, der säiba schuid dro is, wenn eahm wos bassiat is.

U. Heichele

Da Rottmeir Johann, A Hund bist fei scho, 224 Seitn, 19,90 Euro, Volk Verlag.

Auch interessant

Meistgelesen

Sirenen: Heute um 11 Uhr Probealarm in Bayern
Sirenen: Heute um 11 Uhr Probealarm in Bayern
Allerheiligen 2017: Wie lange dauert das Tanzverbot in Bayern?
Allerheiligen 2017: Wie lange dauert das Tanzverbot in Bayern?
Wagen geriet auf Gegenfahrbahn: Frauen bei Frontal-Crash schwer verletzt
Wagen geriet auf Gegenfahrbahn: Frauen bei Frontal-Crash schwer verletzt
Bildungsalarm: Niveau bei Grundschülern sinkt, nur Bayern sticht hervor
Bildungsalarm: Niveau bei Grundschülern sinkt, nur Bayern sticht hervor

Kommentare